Эрдэнэс Тавантолгой ХК-ийн хувьцаа эзэмшигчдийн хурлын шийдвэрийн дагуу ногдол ашгийг иргэдийн дансанд шилжүүлэх ажил өнөөдрөөс эхэллээ.
Тус компанийн хувьцаа эзэмшигчдийн хурлаас 2025 оны цэвэр ашгаас ногдол ашиг олгох шийдвэрийг гаргаж, 4 дүгээр сарын 30-ны дотор иргэдэд олгохоор тогтоосон бөгөөд уг шийдвэрийг Засгийн газрын хуралдаанаар хэлэлцэн баталгаажуулсан юм.
Энэ хүрээнд 1072 ширхэг хувьцааг бүрэн эзэмшдэг иргэн татвар суутгасны дараах дүнгээр 63,242 төгрөгийг дансандаа авах боломжтой байна.
Эрдэнэс Тавантолгой ХК нь 2025 оны цэвэр ашгаас нийт 786.6 тэрбум төгрөгийг бүх хувьцаа эзэмшигчдэд ногдол ашиг болгон хуваарилахаар шийдвэрлэсэн бөгөөд үүнээс Монгол Улсын 3.5 сая орчим иргэнд нийт 208.5 тэрбум төгрөгийг олгож байгаа юм.
Албаныхны мэдээлснээр ногдол ашгийг үе шаттайгаар шилжүүлэх бөгөөд иргэдийн дансанд орж эхэлснээр олон нийтийн хүлээлт үүсгээд байсан 1072 хувьцааны өгөөж бодитоор хүртэж эхэлж байна.
