Нийслэлийн Засаг даргын зөвлөлийн 10 дугаар хуралдаан өнөөдөр болж, боловсролын байгууллагын хүнсний хангамж, “Хотхоны бага сургууль” төсөл, хүүхдийн эрх хамгаалал, нийтийн эзэмшлийн талбай чөлөөлөх ажил, барилгын стандарт, хүн амын нягтаршил ихтэй бүсийн хот байгуулалтын бодлогын асуудлуудыг хэлэлцлээ.
Хуралдааны үеэр нийслэлийн Засаг дарга бөгөөд Улаанбаатар хотын Захирагч Б.Пүрэвдагва хүүхдүүдийг сургуульд хүргэж өгөх, авах хөдөлгөөн нь замын түгжрэлийг нэмэгдүүлдэг тул хүүхэд бүр гэртэйгээ ойр сургуульд суралцах боломжийг бүрдүүлэх бодлогыг тууштай хэрэгжүүлэхээ онцолсон байна. Энэ хүрээнд хэрэгжих “Хотхоны бага сургууль” төсөл нь чухал ач холбогдолтой гэж үзэж, төслийн хэрэгжилтийг эрчимжүүлэхийг холбогдох байгууллагуудад үүрэг болгожээ.
Мөн төр хувийн хэвшилтэй өрсөлдөхгүй байх зарчмыг баримталж, ерөнхий боловсролын сургуулийн хоол үйлдвэрлэлийн зарим үйл ажиллагааг нийслэлийн өмчит аж ахуйн нэгжүүдээр гүйцэтгэж байгааг зогсоож, хувийн хэвшлийн оролцоог нэмэгдүүлэхээр болсон байна. Харин нийслэлийн Боловсролын газар нийлүүлэлтийн чанар, аюулгүй байдалд хяналт тавьж, сурагчдын үдийн хоолны чанарыг хангахад анхаарч ажиллахыг үүрэг болгожээ.
Түүнчлэн хүүхдийн үдийн хоолны хүнсний бэлдэц үйлдвэрлэдэг нийслэлийн өмчит дөрвөн компанийн шинэ барилга, агуулах байгуулах асуудлыг төсөвт тусгахгүй бөгөөд төр, хувийн хэвшлийн түншлэлээр хэрэгжүүлэхээр төлөвлөсөн төслүүдийг ч зогсоохоор болсон байна. Үүнтэй холбоотойгоор дээрх байгууллагуудыг татан буулгах, хөрөнгө өмчийн асуудлыг үр ашигтай зохион байгуулах саналаа боловсруулахыг Нийслэлийн Өмчийн харилцааны газарт даалгажээ.
Гол шийдвэрүүд
“Хотхоны бага сургууль” төслийг эрчимжүүлнэ.
Хүүхдийг гэртэй нь ойр сургуульд суралцуулах бодлогыг хэрэгжүүлнэ.
Сургуулийн хоол үйлдвэрлэлд хувийн хэвшлийн оролцоог нэмэгдүүлнэ.
Нийслэлийн өмчит дөрвөн хүнсний бэлдэцийн компанийг татан буулгах чиглэл өглөө.
Хүүхдийн үдийн хоолны чанар, аюулгүй байдалд хяналтыг чангатгана.
Хот байгуулалт, барилгын стандарт, хүн амын нягтаршилтай бүсийн асуудлыг үргэлжлүүлэн анхаарна.
