Авлигатай тэмцэх газрын Мөрдөн шалгах хэлтэс Төрийн нарийн бичгийн даргаар ажиллаж байсан Н.Тавинбэх болон бусад холбогдох этгээдүүдэд холбогдох хэргийг мөрдөн шалгаж дуусган, шүүхэд шилжүүлэх саналтайгаар прокурорын байгууллагад хүргүүлжээ.
Мөрдөн шалгалтын явцад Н.Тавинбэх нь бусадтай бүлэглэн төслийн хүрээнд гүйцэтгэл хангалтгүй байсан зөвлөх үйлчилгээ үзүүлэгч аж ахуйн нэгжийн гэрээний хугацааг сунгуулах, мөн зөвлөх үйлчилгээний төсвийг 2.9 сая гаруй ам.доллараар нэмэгдүүлэн тухайн компанид эдийн засгийн давуу байдал бий болгосон байж болзошгүй нөхцөл байдал тогтоогдсон байна.
АТГ-аас мэдээлснээр 2026 оны зургаадугаар сарын 8-14-ний өдрүүдэд гэмт хэргийн шинжтэй 130 гомдол, мэдээлэл шалгаснаас 23-т нь хэрэг бүртгэлтийн хэрэг нээх, 21-т нь хэрэг нээхээс татгалзах саналтайгаар прокурорт шилжүүлжээ. Одоогоор 86 гомдол, мэдээллийг шалгаж байгаа аж.
Мөн тус хугацаанд эрүүгийн 1030 хэрэгт мөрдөн шалгах ажиллагаа явуулснаас 16 хэргийг шүүхэд шилжүүлэх, 23 хэргийг хаах, нэг хэргийг харьяаллын дагуу шилжүүлэх саналтай прокурорт хүргүүлсэн байна.
Үүнээс гадна төрийн үйлчилгээний байгууллагын нэгэн удирдах албан тушаалтан ажлын хэсгийн даргаар ажиллахдаа үржлийн 19 толгой үхрийг өөртөө болон бусдад давуу байдлаар олгож, улсад 221.9 сая төгрөгийн хохирол учруулсан, мөн өөртэй нь хамаарал бүхий аж ахуйн нэгжүүдэд давуу байдал олгосон гэх үндэслэлээр шалгасан хэргийг ч шүүхэд шилжүүлэх саналтайгаар прокурорт хүргүүлжээ.
Одоо прокурорын байгууллага дээрх хэргүүдийг хянаж үзээд шүүхэд шилжүүлэх эсэх талаар эцсийн шийдвэр гаргах юм.
