“Алтан цом”-ын барилдааны үеэр өгсөн амлалт биеллээ олж, Э.Батмагнай ирэх сарын дундуур өсвөрийн бөх С.Тэнүүний бэлтгэл дээр очихоор болжээ.
Сонирхолтой энэ үйл явдал “Алтан цом”-ын төлөөх барилдааны үеэр эхэлсэн байна. Өсвөрийн бөх С.Тэнүүн өөрийн үлгэр дуурайлал авч, дэмждэг бөх болох Улсын арслан Э.Батмагнайгаас “Энэ бичлэг хэдэн лайк хүрвэл манай бэлтгэл дээр ирэх вэ?” хэмээн асуухад арслан 5,000 лайк хүрвэл очно хэмээн амлажээ.
Тухайн бичлэг олон нийтийн сүлжээнд богино хугацаанд олны анхаарал татаж, нэг цаг хүрэхгүй хугацаанд 5,000 лайк давсан байна. Үүний дараа С.Тэнүүн амлалтаа сануулж, хэзээ ирэхийг асуухад Э.Батмагнай арслан хэлсэндээ хүрч, ирэх сарын дундуур бэлтгэл дээр нь очихоо мэдэгджээ.
Энэ үйл явдал цахим орчинд олны талархлыг хүлээж, амлалтаа биелүүлсэн нь хүүхэд залууст урам өгсөн эерэг үйл явдал хэмээн үнэлэгдэж байна. Мөн үндэсний бөхийн ахмад, залуу үеийн холбоо, үлгэрлэл, хүмүүжлийн ач холбогдлыг харуулсан үйл явдал боллоо гэж бөх сонирхогчид онцолж байна.
Шүтээн бөхтэйгээ уулзах боломж бүрдсэн нь өсвөрийн бөх С.Тэнүүний хувьд том урам зориг болж байгаа бол Э.Батмагнай арслангийн хувьд залуу үеэ дэмжсэн сайхан жишээ болж байна.
