АНУ-ын зуучлалаар өрнөж буй Орос-Украины энхийн яриа хэлэлцээний хүрээнд талууд түр хугацааны гал зогсоох тохиролцоонд ойртож, олзлогдогч солилцох асуудлыг хэлэлцэж эхэлжээ.
Олон улсын хэвлэлүүдийн мэдээлснээр Орос, Украин улс гурван өдрийн хугацаатай гал зогсоох хувилбарыг хэлэлцэж байгаа бөгөөд үүний зэрэгцээ хоёр талаас тус бүр 1000 хүртэлх олзлогдогч солилцох боломжийг судалж байна. Энэхүү санаачилгыг АНУ болон Европын холбоотнууд дипломат шугамаар дэмжиж байгаа аж.
Хэлэлцээний зорилго нь фронтын бүсэд үүсээд буй хүмүүнлэгийн нөхцөл байдлыг тогтворжуулах, шархадсан цэргүүд болон энгийн иргэдийг нүүлгэн шилжүүлэх нөхцөл бүрдүүлэхэд чиглэж байгаа талаар эх сурвалжууд мэдээлжээ.
Оросын тал гал зогсоох асуудлыг “түр хугацааны хүмүүнлэгийн арга хэмжээ” гэж тодорхойлсон бол Украины эрх баригчид тогтвортой энхийн хэлэлцээ хийхэд олон улсын баталгаа шаардлагатай гэж үзэж байна.
Мөн олзлогдогч солилцооны асуудал нь хоёр улсын хооронд сүүлийн саруудад яригдсан хамгийн том хэмжээний хүмүүнлэгийн тохиролцоонд тооцогдож байгаа бөгөөд Турк, Катар зэрэг улсууд зуучлалын үйл явцад оролцож байгаа талаар мэдээлжээ.
Шинжээчдийн үзэж буйгаар хэрэв түр гал зогсоох хэлэлцээр хэрэгжвэл энэ нь 2022 онд дайн эхэлснээс хойших хамгийн том дипломат ахицын нэг болж магадгүй байна. Гэвч фронтын бүс дэх тулаан үргэлжилж байгаа нь эцсийн тохиролцоонд хүрэхэд эрсдэл дагуулж буйг олон улсын ажиглагчид анхааруулжээ.
