Долдугаар сарын 15-наас эхлэн АИ-92 автобензиний жижиглэнгийн үнэ литр тутамдаа 250-300 төгрөгөөр өссөн байна.
Албаныхны тайлбарласнаар дэлхийн зах зээлд газрын тосны үнэ өссөнтэй холбоотойгоор ОХУ-аас Монгол Улсад нийлүүлж буй шатахууны экспортын үнэ нэмэгджээ. Ингэснээр нэг тонн АИ-92 шатахууны үнэ 705 ам.доллараас 800 ам.доллар болж, 95 ам.доллараар өссөн байна.
Орон нутгийн замын төлбөр нэмэгдэнэ
Зам, тээврийн хөгжлийн төвийн мэдээлснээр наймдугаар сарын 1-нээс орон нутгийн авто зам ашигласны төлбөрийг шинэчилнэ.
Шинэ тарифаар:
Суудлын автомашин – 1,000 төгрөгөөс 5,000 төгрөг
Ачааны автомашин – 10,000 төгрөгөөс 20,000 төгрөг болж нэмэгдэхээр байна.
Тус байгууллагын мэдээлснээр замын арчлалт, засвар үйлчилгээний санхүүжилтийг нэмэгдүүлэх зорилгоор энэхүү өөрчлөлтийг хийжээ.
Ус, халаалтын шинэ тариф наймдугаар сарын 1-нээс мөрдөгдөнө
Эрчим хүчний зохицуулах хорооны 345 дугаар тогтоол-ын дагуу Улаанбаатар хотын хэрэглэгчдийн ус, дулааны үйлчилгээний тариф мөн шинэчлэгдэнэ.
Үүнд:
Цэвэр усны үнэ м³ тутамд 660 төгрөгөөр
Бохир усны үйлчилгээ м³ тутамд 750 төгрөгөөр
Халаалтын төлбөр м² тутамд 25 төгрөгөөр нэмэгдэж 531 төгрөг
Ус халаасны төлбөр 82 төгрөгөөр өсөж 1714 төгрөг болохоор байна.
Ингэснээр ирэх сарын эхнээс шатахуун, авто замын төлбөр, ус, дулааны үйлчилгээ зэрэг өргөн хэрэглээний хэд хэдэн үйлчилгээний үнэ, тариф зэрэг шинэчлэгдэж, иргэд, аж ахуйн нэгжүүдийн тогтмол зардал нэмэгдэх нөхцөл бүрдээд байна.
