Хонконгийн Их Сургууль-ийн судлаачид мэдрэлийн эмчилгээний нунтгийг тархинд шууд хүргэдэг дэлхийд анхны хамрын цацлагыг бүтээжээ. “NanoPowder” нэртэй энэхүү бэлдмэл нь тархины цусан хангамжийн дутагдлаас үүдэлтэй харвалтын үед яаралтай тусламж үзүүлэх зориулалттай аж.
Судлаачдын мэдээлснээр, уг цацлага нь тархины эдийн гэмтлийг 80 гаруй хувиар бууруулж, өвчтөний амьд үлдэх боломжийг мэдэгдэхүйц нэмэгдүүлдэг байна. Энэхүү бүтээл нь олон улсын хэмжээнд өндөр үнэлгээ авч, Женевт болсон Олон улсын шинэ бүтээлийн 51 дүгээр үзэсгэлэнгээс тусгай Гран-При болон алтан медаль хүртжээ.
Шинэ технологийн гол онцлог нь “хамраас тархи руу” чиглэсэн шууд хүргэлтийн сувгийг ашиглаж буй явдал юм. Ингэснээр эм нь тархины гэмтсэн хэсэгт шууд үйлчилж, мэс засал хийх эсвэл тариа тарих шаардлагагүй болох боломжтой гэж судлаачид онцолжээ.
Эхний шатанд уг аргыг түргэн тусламжийн эмч нар ашиглах бөгөөд цаашид харвалтын өндөр эрсдэлтэй хүмүүст үйлчилдэг эмнэлэг, тусгай байгууллагуудад нэвтрүүлэхээр төлөвлөсөн байна. Үүний дараа эмийн сангийн сүлжээгээр дамжуулан олон нийтэд хүргэх аж.
Судалгааны баг шинэ бэлдмэлийн эмнэл зүйн туршилтыг 2030 он гэхэд эхлүүлэхээр төлөвлөж байгаагаа мэдэгджээ.
