АНУ-ын Ерөнхийлөгч Donald Trump-ын захиргаа гадаад оюутнуудад зориулсан хөдөлмөр эрхлэлтийн хөтөлбөрүүдийн нөхцөлийг чангатгах асуудлыг хэлэлцэж эхэлсэн нь Америкийн их, дээд сургуулиудын дунд болгоомжлол үүсгээд байна.
Одоогийн байдлаар АНУ-д төгссөн гадаад оюутнууд тодорхой хугацаанд ажиллах боломжтой байдаг бөгөөд STEM буюу инженер, технологи, шинжлэх ухааны чиглэлээр суралцсан төгсөгчид 3 хүртэл жилийн хугацаанд ажиллах эрх авдаг. Харин шинэ бодлого хэрэгжвэл олон улсын оюутнууд Канад, Австрали, Их Британи зэрэг улсыг сонгох хандлага нэмэгдэж болзошгүйг мэргэжилтнүүд анхааруулжээ.
Мөн АНУ-ын олон их сургууль гадаад оюутны сургалтын төлбөрөөс ихээхэн хамааралтай байдаг тул энэ нь боловсролын байгууллагуудад санхүүгийн дарамт авчирч магадгүй байгаа аж.
Сүүлийн жилүүдэд Энэтхэг, Хятад болон Зүүн өмнөд Азийн орнуудаас АНУ-д суралцах оюутны тоо эрчимтэй өссөн бөгөөд технологийн компаниуд ч гадаад төгсөгчдийг ажилд авах сонирхол өндөр хэвээр байна.
