УИХ-ын хамтарсан хуралдаанаар автомашины албан татвар, авто зам ашигласны төлбөрийг бууруулах болон НӨАТ-ын буцаан олголтыг найман хувьд хүргэх асуудлаар ажлын хэсэг байгуулах саналууд дараалан дэмжлэг авсангүй.
Автомашины албан татвар, зам ашигласны төлбөрийг бууруулах асуудлыг судлах ажлын хэсэг байгуулах санал хураалтад оролцсон 31 гишүүний 17 нь дэмжээгүй байна. Үүний дараа НӨАТ-ын буцаан олголтыг нэмэгдүүлэх асуудлаар ажлын хэсэг байгуулах санал мөн дэмжлэг авч чадсангүй.
Хоёр санал хураалтад хоёуланд нь дэмжээгүй байр суурь илэрхийлсэн есөн гишүүн нь Н.Алтанхуяг, Т.Аубакир, Б.Бат-Эрдэнэ, Х.Баасанжаргал, Ж.Ганбаатар, Ц.Идэрбат, Л.Мөнхбаясгалан, Р.Эрдэнэбүрэн, Ч.Ундрам нар байв.
Автомашины татвар, зам ашигласны төлбөрийг бууруулах асуудал нь Нийслэлийн ИТХ-аас 2024 онд эдгээр төлбөрийг нэмэгдүүлсэн шийдвэртэй холбоотой. Тухайн үед автомашины албан татварыг гурав дахин, зам ашигласны төлбөрийг тав дахин нэмэгдүүлсэн бөгөөд үүний дараа иргэд бууруулах хүсэлтээ УИХ-д уламжилж байжээ.
Гэхдээ ажлын хэсэг байгуулах саналыг дэмжээгүй нь татвар бууруулах асуудлыг зарчмын хувьд эсэргүүцсэн гэсэн үг биш юм. Харин уг асуудлыг тусгайлан судалж, эдийн засгийн тооцоо хийх ажлын хэсэг байгуулах санал энэ удаад дэмжлэг авсангүй.
Ийнхүү иргэдийн татварын ачааллыг бууруулах, НӨАТ-ын буцаан олголтыг нэмэгдүүлэх асуудлаар бодлогын шийдэл боловсруулах үйл явц дахин хойшиллоо.
