Эрдэмтэд шажигнуур могойн цусан дахь байгалийн гаралтай уургуудыг ашиглан үхлийн аюултай могойн хорыг саармагжуулах шинэ аргыг илрүүлжээ.
АНУ-ын Мэрилэндийн их сургуулийн судлаачид баруун бүсийн алмаазан нуруут шажигнуур могойн цусанд байдаг тодорхой уургийн нэгдлүүдийг судалсан байна. Эдгээр уураг нь могойн өөрийнх нь хоронд агуулагддаг эд эсийг гэмтээж, цус алдуулах хорт бодисуудын үйлчлэлийг дарангуйлдаг аж.
Судалгааны үеэр эрдэмтэд эдгээр хамгаалах уургийг хослуулан хэрэглэж, үхлийн тунтай хор тарьсан лабораторийн хулгануудыг хамгаалж чаджээ. Хамгийн сонирхолтой нь уг арга нь зөвхөн нэг төрлийн могойн хоронд бус, хэд хэдэн хорт могойн хорны аюултай үйлчлэлийг саармагжуулах боломжтой байж болзошгүй байна.
Судлаачдын үзэж буйгаар энэ нээлт нь одоогийн уламжлалт эсрэг хорноос өөр зарчимтай, илүү үр дүнтэй шинэ үеийн эмчилгээ боловсруулах үндэс болж магадгүй юм. Гэхдээ одоогоор туршилт лабораторийн түвшинд хийгдсэн тул хүний хэрэглээнд зориулсан эмчилгээ болсон гэсэн үг биш бөгөөд цаашид нэмэлт судалгаа, аюулгүй байдлын туршилт шаардлагатай.
Дэлхий даяар жил бүр могойд хатгуулсны улмаас олон арван мянган хүн амь насаа алддаг тул могойн өөрийн бие махбодь хэдэн сая жилийн турш хөгжүүлсэн энэхүү байгалийн хамгаалалтын механизмыг ашиглах нь ирээдүйн эсрэг хор боловсруулахад шинэ боломж нээж байна.
эх сурвалж: the nature
