Европын Комисс ОХУ-ын Сибирийн Эрхүү мужид уушгины тахлын халдвар гарсан байж болзошгүй талаарх мэдээллийг “маш анхааралтай” ажиглаж байгаагаа мэдэгдлээ.
Энэ асуудал Эрхүүгийн Тахлын эсрэг судалгааны хүрээлэнгийн 28 настай ажилтан Дарья Шипилова аравдугаар сарын 2-нд шалтгаан нь тодорхойгүй хатгалгааны улмаас нас барснаар анхаарлын төвд орсон байна. Түүний ойрын хавьтал болсон 200 орчим хүнийг эмнэлгийн хяналтад авчээ.
Зарим орон нутгийн мэдээлэлд талийгаач лабораторид ажиллаж байхдаа тахлын нян агуулсан хуруу шил хагалсан байж болзошгүй гэж мэдээлсэн ч ОХУ-ын эрх баригчид үүнийг батлаагүй. Роспотребнадзор шинжилгээгээр тахал үүсгэгч нян илрээгүй, мөн хүрээлэнд аюултай бичил биетэнтэй холбоотой осол бүртгэгдээгүй гэж мэдэгдсэн байна.
Европын Комисс уг нөхцөл байдлыг Европын Өвчнөөс урьдчилан сэргийлэх, хянах төвийн мэргэжилтнүүдтэй хамтран ажиглаж байгаа бөгөөд ДЭМБ-ын сувгаар ОХУ-аас мэдээлэл авч байна. Комисс мөн нөхцөл байдлын талаар шуурхай, ил тод мэдээлэл өгөх нь чухал гэж онцолжээ.
Үүний зэрэгцээ Кремль болон ОХУ-ын эрүүл мэндийн байгууллагууд иргэдийг баталгаагүй мэдээлэл, цуурхалд автахгүй байхыг уриалж, Эрхүү муж дахь нөхцөл байдлыг хяналтад байгаа, тогтвортой гэж мэдээлж байна. Одоогоор хүнээс хүнд тархсан тахлын шинэ тохиолдол батлагдаагүй байна.
